Nada na Coruña no 1919, trasládase máis tarde ao concello de Culleredo. Pintou moito e moi ben segundo as críticas publicadas na prensa da súa época. Estas loaron o realismo, precisión, refinamento e beleza coas que pintaba.
A temática da súa obra pictórica é variada: reflicte paisaxes, retratos, bodegóns e, sobre todo, flores. Foi coñecida como a pintora das flores. Non había flor que tivera segredos para ela así coma os toxos, as xestas, os croques, os pexegueiros…
A súa primeira exposición foi presentada na sala da Asociación de Artistas da Coruña, en xaneiro de 1942, á idade de 23 anos.
Sábese que participou en exposicións realizadas en cidades galegas, ademais da Coruña ou Vigo, e noutras cidades como Salamanca, Madrid, Oviedo, León, Málaga ou Valencia. A súa obra atópase espallada por diversos países: Arxentina, Cuba, España, Estados Unidos, Inglaterra, Italia…
María Cagiao pintou case todas as súas obras ao óleo e sobre lenzo, unhas veces utilizou pincel e outras espátula, coa que acadou cimas de perfección insuperables. As dúas principais características da súa obra son a cor e luz.
