A Coruña das Mulleres

Somos un grupo de persoas que traballa no coñecemento da historia das mulleres na cidade da Coruña

María Miramontes

María Miramontes

María de los Dolores Miramontes Matos nace en Santa María de Guísamo (Bergondo- A Coruña) en 1895. Comeza a traballar con 11 anos nun obradoiro de costura na Coruña, nesa cidade na que xermola o pensamento nacionalista e galeguista en lugares como a Cova Céltica. María Miramontes, moza esperta, intelixente e aberta, edúcase en todo este mundo e así frecuenta os núcleos republicanos na compañía de Elvira Bao, Pilar Castro, Amparo López Jean e, moi nova aínda, milita nas Irmandades da Fala, entidade que vai chegar a ter máis de 200 socias. María Miramontes aparece xa nas listaxes da sección feminina no ano 1918. Seguramente, nestes ambientes republicanos, progresistas e galeguistas coñece o home co que vai compartir vida, pensamento e militancia e co que casará en 1920, Ánxel Casal.  Xa xuntos, abren no número 9 da Rúa Panadeiras un pequeno comercio de venda de teas. Os ingresos cativos desta actividade fan que María se dedique tamén á súa profesión de modista mentres que Ánxel completa a economía con clases de francés e traducións. A parella non só mantén a súa vida en común senón que alimenta economicamente iniciativas múltiples do nacionalismo e da cultura de Galiza: as Irmandades da Fala, a editorial Lar, despois a editorial Nós e unha escola aberta e popular, as Escolas do Insiño Galego, con ensino bilingüe e educación progresista e laica inspirada na Institución Libre de Enseñanza, para así facer que os nenos e nenas das clases traballadoras poidan aprender e formarse no coñecemento e amor por Galiza. No 1931 deciden trasladarse a Compostela  para estar máis preto do Seminario de Estudos Galegos, xa que a Editorial Nós publicaba todas as obras desta institución. Cando no mes de decembro deste 1931 nace o Partido Galeguista, María, xunto a Genoveva Casal e un grupo, non demasiado numeroso, de mulleres traballa a prol de convencer o pobo galego, e moi especialmente as mulleres, da necesidade que Galiza ten de dotarse dunha forza política propia.

María Miramontes
Entrega do Estatuto

María vai participar activamente na campaña de apoio ao Estatuto que se vai referendar o 26 de xuño de 1936. O 15 de xullo Ánxel Casal facía entrega do Estatuto de Galicia, xunto a toda a Comisión designada para esta función, ao Presidente das Cortes e ao Presidente da República e nesa foto histórica está unha única muller María Miramontes.

O 18 de xullo ten lugar a sublevación militar franquista. O día 20 de xullo, Ánxel Casal, que acababa chegar de Madrid, faise cargo da alcaldía e ponse á fronte do Comité Republicano de Santiago, mais uns días despois é detido e conducido á cadea de Santiago e brutalmente asasinado nunha gabia en Cacheiras na noite do 18 ao 19 de agosto.
No mes de novembro de 1936, María  embarca vía Lisboa, rumbo a Bos Aires, onde ten parte da súa familia emigrada. Cando chega alí volve ser modista e o pouco que sabemos dela será pola familia Seoane, Maruxa e Luís… O silencio e o esquecemento fixeron de María Miramontes unha muller inxustamente invisibilizada.

Comparte esta biografía

Share on facebook
Share on twitter
Share on whatsapp
Share on telegram

Explorar máis

Pilar Castillo
Pioneiras

Pilar Castillo Sánchez

Pilar Castillo Sánchez foi umha pianista galega de reconhecimento internacional. Nasce na Corunha a 11 de maio de 1890 (Pico Orjais, 2018b) no seio dumha

Ler máis »

Uso de cookies

Utilizamos cookies propias e de terceiros, como Google Analytics, para optimizar a túa navegación e realizar tarefas de análise. Entendemos que estás conforme se continúas navegando nesta web. Política de cookies

ACEPTAR
Aviso de cookies