A Coruña das Mulleres

Somos un grupo de persoas que traballa no coñecemento da historia das mulleres na cidade da Coruña

Juana de Vega

Juana de Vega

En marzo de 1805 nace na Coruña Juana María de la Vega Martínez y Losada, coñecida como Juana de Vega (1805 – 1872). Nada no seo dunha familia ilustrada e liberal, seu pai foi un dos principais organizadores e patrocinadores do pronunciamento de Juan Díaz Porlier a favor da Constitución de 1812, desde nena recibiu unha esmerada educación en letras e humanidades.

Cando tiña quince anos coñece a Francisco Espoz y Mina, co que casa en 1821. O seu home foi unha das figuras máis relevantes da Guerra da Independencia española, alcanzando o grao de Mariscal de Campo, mais o regreso de Fernando VII obrigou a Mina a exiliarse e Juana de Vega únese ao seu home nese exilio por Inglaterra e Francia. Falecido Espoz y Mina en 1836, o goberno outorgou á súa viúva o título de condesa de Espoz y Mina e Juana de Vega regresa entón á Coruña. Nos últimos trinta anos da súa vida, os salóns da súa casa serían o punto de reunión da sociedade liberal coruñesa, cidade onde exercería ademais como mecenas, exemplo disto é o caso do violinista Pablo Sarasate ou o seu apoio aos Xogos Florais de 1861 celebrados en Coruña, que constitúen un punto de partida do Rexurdimento.

Outra das súas constantes dedicacións foi a beneficencia. O seu labor foi fundamental para conseguir que Galiza contase cun Hospital Psiquiátrico en Conxo. O seu labor asistencial comezou en 1838 cando iniciou os trámites para fundar a Asociación de Señoras de La Coruña. A súa finalidade foi coidar de nenas/os orfos e asistir os enfermos do Hospital da Caridade desde presupostos liberais centrados na “humanidade doente” e sen relación coas institucións católicas. Pero a súa preocupación social non se reduciu ao campo asistencial, outra preocupación súa foi a educación. Fundou e financiou unha escola para nenos pobres, rexentada polas Hijas de la Caridad de la Congregación de San Vicente de Paúl, en 1863; e unha escola gratuíta para adultos, levantada en 1864 na súa propia casa.

Fundación Juana de Vega
Fundación Juana de Vega

A finais de 1840, Juana de Vega aceptou o cargo de Aia da raíña nena Isabel II e da súa irmá, foi responsable de supervisar o seu coidado e educación. En outubro de 1842 foi nomeada tamén Camareira maior de Palacio, ambos os cargos foran sempre ocupados por mulleres da alta nobreza, o que lle xerou moitas tensións na Corte. Permaneceu nestas ocupacións até xullo de 1843.

Xa de volta na Coruña foi moi amiga e deu sempre o seu apoio, moitas veces de xeito económico (no seu testamento déixalle corenta mil reais), a Concepción Arenal, a máis importante activista e pensadora social do século XIX no estado español. En 1868, Juana de Vega e Concepción Arenal reclaman publicamente peticións de indulto para os condenados a morte e protestan xuntas pola supresión das Conferencias da Congregación de San Vicente de Paúl. Juana de Vega tamén intercedera en 1862 para pedir o indulto de dous protestantes condenados a pena de cárcere por motivos relixiosos. Fundaron xuntas un padroado de señoras para a visita e ensino das persoas presas. Coincidiu tamén con Concepción Arenal na necesaria difusión en Galiza de temas agrícolas, base do desenvolvemento do país naquela época. O seu grande anhelo era a creación dunha escola teórico–práctica de agricultura, na casa que posuía en San Pedro de Nós, para iso constituíu unha fundación á que vinculou as rendas do seu patrimonio; fundación que chega ata os noso días.

Testamento de Juana de Vega

Pantalla completa

Comparte esta biografía

Share on facebook
Share on twitter
Share on whatsapp
Share on telegram

Explorar máis

Juana de Vega
Pioneiras

Juana de Vega

En marzo de 1805 nace na Coruña Juana María de la Vega Martínez y Losada, coñecida como Juana de Vega (1805 – 1872). Nada no

Ler máis »

Uso de cookies

Utilizamos cookies propias e de terceiros, como Google Analytics, para optimizar a túa navegación e realizar tarefas de análise. Entendemos que estás conforme se continúas navegando nesta web. Política de cookies

ACEPTAR
Aviso de cookies