A atleta Ánxeles Barreiro Rico foi a primeira deportista coruñesa en participar nuns Xogos Olímpicos. Competiu en lanzamento de disco nos que organizou a cidade de Barcelona no ano 1992.
Naceu en Boimorto en 1963, mais é na Coruña onde desenvolveu a súa actividade atlética, posto que foi na Escola de Lanzamentos dirixida por Raimundo Fernández, o técnico que moldeou a súa carreira, onde aprendeu a técnica precisa para competir nas mellores condicións. Os adestramentos realizados en Riazor propiciaron que se convertese nunha lanzadora de elite e competiu coas cores do Deportivo cando a entidade contaba cunha sección de atletismo. Gañou en once ocasións o título español absoluto en lanzamento de disco e bateu en dezaoito ocasións a mellor marca española, ata deixala en 60.56 m no ano 1994. Ese rexistro tardou vinte e un anos en ser superado.
Logrou ser trinta e seis veces internacional e acadou dúas medallas nos Xogos Iberoamericanos. No ano 1983 logrou a de bronce e sete máis tarde mellorou a súa clasificación ao conseguir ocupar a segunda praza. Ao longo da súa vida deportiva tamén realizou algún concurso no lanzamento de peso, modalidade na que se adxudicou varios campionatos galegos.
